منتـديات شبكــــة عـمـران القـانـونـيـة




 
 عدد الضغطات  : 0

العودة   منتـديات شبكــــة عـمـران القـانـونـيـة المنتديات الخاصة منتدي الفنون العربية منتدي الشعر والقصة

إضافة رد
   
أدوات الموضوع إبحث في الموضوع

  #1  
قديم 24 / 02 / 2009, 36 : 04 PM
ايهاب وافى
زائر
 
المشاركات: n/a
افتراضي الأرض( امير الزجالين عمنا بيرم )

يا أرض مالك كرهتى كل سكانك

في يوم زلازل و يوم يجرفنا طوفانك

و يوم عواصف و يوم يشتد بركانك

راح فين بهاكى و حلمك فين و حنانك ؟

رحيمه فاضت لنا بالخير أنهارك

جميله متزوقة فى وشى أزهارك

طروب تعزف لنا الأنغام أطيارك

كريمه ما ينقطع نخلك و رمانك
رد مع اقتباس

  #2  
قديم 24 / 02 / 2009, 10 : 05 PM
ايهاب وافى
زائر
 
المشاركات: n/a
افتراضي بيرم التونسى


يا اهل المغنى دماغنا وجعنا دقيقه سكوت لله

داحنا شبعنا كلام ماله معنى يا ليل و يا عين و يا آه



طلعت موضه غصون و بلابل شابط فيها حزين

شاكي و باكي و قال مش عارف يشكي و يبكي لمين

و اللي جابت له الداء و الكافيه طرشه ماهش سامعاه

يا اهل المغنى دماغنا وجعنا دقيقه سكوت لله



ردي عليه يا طيور بينادي و ارمي له الجناحين

و انت كمان يا بابور الوادي ، قل له رايح على فين

قل ليه إياك يرتاح يا بابوره ، و يريحنا معاه

يا اهل المغنى دماغنا وجعنا دقيقه سكوت لله



كل جدع فرحان بشبابه يقول في عينيه دموع

يا للي جلبتي شقاه و عذابه ، حلي لنا الموضوع

طالع نازل يلقى عوازل واقفه بتستناه

يا اهل المغنى دماغنا وجعنا دقيقه سكوت لله



حافضين عشره اتناشر كلمه ، نقل من الجورنال

شوق و حنين و أمل و أماني و صد و تيه و دلال

و اللي اتعاد ينزاد يا اخوانا و ليل و نهار هواه

يا اهل المغنى دماغنا وجعنا دقيقه سكوت لله

التعديل الأخير تم بواسطة مازن اسماعيل ; 16 / 08 / 2010 الساعة 44 : 02 PM
رد مع اقتباس

  #3  
قديم 24 / 02 / 2009, 12 : 05 PM
ايهاب وافى
زائر
 
المشاركات: n/a
افتراضي العامل المصري (لعمنا بيرم التونسى)

ليه أمشي حافي ، و نا منبت مراكيبكم

ليه فرشي عريان ، و نا منجد مراتبكم

ليه بيتي ، خربان و نا نجار دواليبكم

هي كده قسمتي ؟

الله يحاسبكم



ساكنين علالي العتب ، و نا اللي بانيها

فارشين مفارش قصب ، ناسج حواشيها

قانيين سواقي دهب ، و نا اللي ادور فيها

يا رب ما هوش حسد

لكن بعاتبكم



من الصباح للمسا ، و المطرقة ف إيدي

صابر على دى الأسا ، حتى نهار عيدي

ابن السبيل انكسى ، و اسحب هرابيدي

تتعروا من مشيتي

و اخجل أخاطبكم



ليه تهدموني و نا اللي عزكم باني

أنا اللي فوق جسمكم قطني و كتاني

عيلتي في يوم دفنتي ما لقيتش أكفاني

حتى الأسيه ، و نا راحل و سايبكم
رد مع اقتباس

  #4  
قديم 24 / 02 / 2009, 13 : 05 PM
ايهاب وافى
زائر
 
المشاركات: n/a
افتراضي عزرائيل ( لعمنا بيرم التونسى)

في النوم رأيت عزرائيل
مركيز أوروباوي

ضوفره انجليزي طويل
معروج و سبعاوي

و ناب يشيل ألف فيل
أزرق فرنساوي

و الفم يبلع قبيل
في مجره نمساوي




عليه قميص من سواد
فاشيست طلياني

و جنبه منجم حصاد
من صلب جرماني

و ف خرجه زواد و زاد
من بمب بريطاني

و معاه خناجر بولاد
من دقه يوناني




واقف في نص الطريق
و الوقفه مكسيكي

ماسك تليسكوب دقيق
من طرز أمريكي
ينظر في منجم عميق فيه فحم بلجيكي

يستنى إمتى الحريق


يشعل ميكانيكي



قريت عليه السلام
قام رد بلغاري

طلبت منه الكلام
كلمني بافاري

شاورت باليد قام
شاورلي هنغاري

صحيت أنا من المنام
أقرض في أظفاري
رد مع اقتباس

  #5  
قديم 24 / 02 / 2009, 14 : 05 PM
ايهاب وافى
زائر
 
المشاركات: n/a
افتراضي باريس خلاص (لعمنا بيرم التونسى)

يا مسلمين لما اسكندر حكم على الدنيا و دبر
شاف المداين و اتخير اسكندرية و سماها

يوناني و يحب الغارة و رخره زيه ام منارة
جبار و عاشق جباره طلع هواه وفق هواها

اسكندر اللي بجنوده الشرق و الغرب ف إيده
و الإنس و الجن عبيده باسكندرية بيتباهى

وافقت عظمته و جبروته لا يفوتها لحظة و لا تفوته
الإمبراطور في تابوته نايم هنا تحت ثراها

أما احنا يا اسكندرانية طالعين جميعاً شضلية
طبيعة في الطين و الميه متركبة تحت سماها

الاسكندراني إذا صافح يغلط ساعات و يروح ناطح
وارثها عن جده الفاتح فحل الملوك اللي حماها

الاسكندراني إذا اتحذلق جلنف لكن له مبدأ
يغواه لحد ما يتزحلق في نايبة عمره ما ينساها

الاسكندراني إذا اتحمس يفقد صوابه و يتطلمس
لحد ما يروح متكربس في نقرة إبليس يخشاها

لكن يقوم يغسل وشه و يروح يجيب اللي غشه
خلقته و يرح ناتشه راسين يعيش مسخة بعاهة

و نا اللي جيت من سياله فيها العيال و الرجاله
شجعان و لكن بهباله يا ننتصر يا أكلناها
رد مع اقتباس

  #6  
قديم 24 / 02 / 2009, 15 : 05 PM
ايهاب وافى
زائر
 
المشاركات: n/a
افتراضي الضرائب (لعمنا بيرم التونسى)


يسرني و يهنيني أدفع ضرايب على عيني
أدفع ألوفي و ملاييني لكن تعالوا حاسبوني
أكون سعيد و أكون شافع لو تتصرف على شيء نافع
مثلاً مصانع و مدافع و لا على القصر العيني
و اقطع لكم لحم كتافي و أبيع هدومي و لحافي
و لااشوفش جايع و لا حافي يغمني و يبكيني
و بادعي أيام و ليالي أشوف كده السد العالي
و أقول دا مبني من مالي و كد إيدي و جبيني
و يا سلام لما تجيلنا ... النفاثات مع أساطيلنا
يومها صحيح نبقى وصلنا و اقول يا عالم هنوني
و ابات مضمضم متكدر... لما الضريبة تتبحتر
مهيه للأستاذ بعجر ... و عبده شخرم بسيوني
اللي ابنه بعته ف أوروبا و من فلوسي بيتربى
قريب يعود زي الضربه و يقول مع والدي خدوني
جثه على المكتب قاعده أو في القهاوي متواعده
ماهيش سياسة و لا عداله الأمة نصها شغاله
و نصها التاني عاله يتبط و يقول رقوني
رد مع اقتباس

  #7  
قديم 24 / 02 / 2009, 17 : 05 PM
ايهاب وافى
زائر
 
المشاركات: n/a
افتراضي شوفي لنا بنت حلال (لعمنا بيرم التونسى )امير الزجالين

جدع معلم قال لخالتك ام هلال
شوفي لنا بنت حلال تكون لطيفة و عال

بنات كتير حلوين عند اهلهم قاعدين
ما بين طبيخ و عجين و بختهم بطال

عايزها لحم فصوص مش عود قصب ممصوص
و محربقه بعصعوص و عامله روحها غزال

عايز قوام يتهز إن دزيتيه يندز
و ف كل مفصل حز يفكرك بهلال

عايز نتايه صحيح من ربع شمع تسيح
مهوش بشكل قبيح لكن بذوق و دلال

عندك بنات جمالات مقلوظين نتايات
و دمهم شربات يسكر نسا و رجال

تحققي في الزين البنت ترخي العين
دي مهرها ألفين أحطهم في الحال

أما اللي عاملة سبور و جدها بلفور
و عايزه واد دكتور خسارة فيها ريال

و لا اللي عاملة إله و شعرها قصاه
و بأكسجين صابغاه دي تجلب الإسهال

و ان جبتي واحده بكرش من الحمير ما تغيرش
مانيش واخدها بقرش و احط فوقها شوال
رد مع اقتباس

  #8  
قديم 24 / 02 / 2009, 18 : 05 PM
ايهاب وافى
زائر
 
المشاركات: n/a
افتراضي عطشان يا صبايا (لعمنا بيرم التونسى)

عطشان يا صبايا عطشان يا مصريين
عطشان و النيل في بلادكم متعكر مليان طين
و لا نهر الرون يرويني و لا مية نهر السين
و دموع العين ما بتروي نار القلب الحزين
شده و تزول يا معوض سبحانه رب معين
دي تلات حكومات يا خوانا ظلموني و اشكي لمين
يا بنت باريس اسقيني كاساتك مليانين
فاضل ع العتبة الخضرا عشرين عام ع الهجين
زغروته يام سدحمد زغروته يام ياسين
راجع أتوضى و اصلي و ازور سيدنا الحسين
و أبوس إيد الشيخ بلبع و إيد الباشا التخين
و أقول سلامات لخليفه و لشعبان طيبين
و اتوب على سيدي لاظوغلي عن كار الجرانين
و أتجوز بنت الماشطة و الكوديه ام اسماعين
اياك يتعدل بختي و اخدم في الدواوين
و البس لي سموكن مقصب و ابقى البيه التخين
ياما ناس في نعيم و ف نعمه و بتمشي ع العجين
غيرشي جعلوا التخشيبة للغلبان الفطين
يخرج منها و يتسوح من مرسيليا للصين
دا جازاة الخايب اللي يعشق بنت التسعين
شايف من تحت البرقع أهدابها مرعرعين
ما حسبش حنكها مطبق و سنانها مهرتمين
و الفم المحمودية و الراس دي راس التين
و تحب كمان و ترافق أهل الدنيا و الدين
و لا تطرد بياع رنجة و لا بياع الفلين
و ولادها اسم الله عليهم يتعدوا بالملايين
رجاله و صنايعية بياعين شرايين
واحد تاجر طعمية و التاني بتاع مصارين
و اللي يبيع جوافه و اللي يبيع سردين
و واحد كمساري افرنجي قاعد في وابور طحين
و اتنين سارحين بكلونيا و فنلات معتبرين
و الحاج محمد برعي له فابريكة كوانين
و أخوه له معمل طرشي مشهور في الكعكيين
و الكل يزيد و يبارك قاعدين متصنعين
ما ينوب الواحد منهم غير قفل الدكاكين
يا رازق جيش الأزهر إياك نستعين
.......................... .....................
يا باريز يام بلاد بره يا مربية لامارتين
بعتت لك أم الدنيا شاعر في الشعر متين
بعمل أشعار لبرابره و صعايدة و فلاحين
و تلامذة و أزهرية و خوجات و مفتشين
إياك ما يموتش عندك في أوتيل المساكين
رد مع اقتباس

  #9  
قديم 19 / 03 / 2009, 20 : 04 PM
ايهاب وافى
زائر
 
المشاركات: n/a
افتراضي من اشعار امير الزجالين (عمنا بيرم التونسى ) تحياتى ايهاب وافى

سيد درويش



من بعد موته بعام طلعت لنا أقوام

حطّوا عليه مَكَدام و قالوا فنُّه قديم

* * *

قديم و سوقه بار و شغل طبله و طار

و شبعانين أدوار و شبعانين تقسيم

* * *

هُوَّ القديم يا قوم يقدم في ليلة و يوم

هو بصل أم توم و لاَّ بلح إبريم

* * *

ده فنه لو ينزاع و ف تسجيلات يتباع

لتصبحوا صياع ما تكسبوش مليم

* * *

أنا عشقت بكام ؟ و نا هويت يا سلام

و منيتي دي غرام أروح معاها غريم

* * *

هو العظيم يا ناس في أرضكم ينداس

و التافه الهلاَّس نشبعه تكريم ؟

* * *

قولوا تخمنا السوق حتى صبح مخنوق

بفننا المسروق من إرث كل يتيم







الجماهير



م المستحيل انت تخدع أي طفل صغير

و تلف عقله و تعطيه القليل بكتير

لكن بأهون طريقه تخدع الجماهير

لو كنت أغبى غبي تجري وراك و تسير

. . . .

* * *

خليل يصقَّف , يصقف شعب ويا خليل

من غير ما يسأل عن الأسباب و التفاصيل

* * *

و حمار يغني , و جايب من يقول له : آه

حالاً تقول الخلايق كلها و يّاه

* * *

الحق يخفى و في وسط الزحام ينداس

و ناس في فهم الحقيقه , تتكل على ناس

و يساعدك الحظ ياللي تحسن التجعير







جهل .. فقر .. مرض



الجهل قال للصنايعي : إخلف المواعيد

و قول لهم بعد بكره , و بعد بكره.. عيد

واحلف لهم بالطلاق , إن القديم دا جديد

تفوت عليه السنه , يقعد يِنِشّ و حيد

و يبتدي الفقر , و الأمراض , و التشريد

في مره يسرح بقُفَّه : يا حمش و يا لذيذ

و يوم يبيع يانصيب إن كان صنعه تفيد

و يوم في عركه العساكر يسحبوه في حديد

و لما ينصاب براجعه أو بتيفوئيد

تقول أُمه : دي عين حطت عليك يا بعيد







الصنم



هبط الجنيه من قمّته و المليونير : ضج و لطم

و لما تهبط ذمته الحزن ينساه و الألم

و لما تسقط حرمته يظن روحه محترم

عنده الجنيهات كل شيء و كل شيء غيرها عدم

* * *

أما الفقير قام و استجار و من الهلع قلبه انخلع

بايت يفكر .. ليل نهار ليرتفع سعر السلع

و اللحمه اهيه و الخضار أسعرها حتسوق الدلع

ياما الجنيه رخّص رجال و غَلىَّ أسعار الغنم

* * *

. . . . .

دي جيفه منتنه صار ابن آدم عبدها

فليسقط الصنم الجنيه اللي بتسجد له الأمم







رأس المال



جبان يفزع و يتخبىَّ إذا هَبَّ النسيم حبَّه

و لما تعصف الأرياح يخلي حبته قُبَّه

* * *

و لما يقولوا دي مظاهره بريئة من بنات طاهرة

بنوك القطر و القاهره تحط القفل و الضبه

* * *

و لو عيل بزماره نفخ في أيها حاره

يقول الليلة فيه غاره و أنا اللي حاكل الضربه

* * *

. . . . .

يا رأس المال يا متدلِّلْ عايز لك للسكن منزل

فراشه ورد و قرنفل و روضة فيها تتربَّى







بخمسين قرش



بخمسين قرش ترفع ميكرفونك

لوش الفجر , و زيادة شويه

و خمسين قرش , توضع نص درهم

في جيب خصمك و ترميه في بليِّه

و خمسين قرش , تنهب أجزخانه

من المستشفيات القاهرية

و خمسين قرش , يعفيك المفتّش

من الغرامات , و يشطب لك قضيه

و خمسين قرش , تتبدّل محاضر

بتهمه عليك و تتحوّل عليه

و خمسين قرش , شيخ حارتك يخلِّي

ولادك , يهربوا من العسكريه

و خمسين قرش , محفظتك تعود لك

من النشال بالوسطه القويه

و خمسين قرش أكتب لك مقاله

بأنك من رجال العبقريه





* * * * * *

22/02/1922 - تصريح بريطاني بمقتضاه أصبحت مصر ملكية و أصبح السلطان فؤاد ملكاً على مصر

رسالة من منفاه في تونس تهنئة يقول فيها



و لما عَدمْنا بمصر الملوك

جابوك لانجليز يا فؤاد قَعَّدُوك

تمثِّل على العرش دُور الملوك

لا مصر استقلِّت و لا يحزنون



غنّى عدلي فخري- بخمسين قرش و التهنئة- في حفلات برلين الغربية عام 1974

التهنئة جرى لها تعديل في البيت الثاني= جابوك لامريكان يا سادات قَعَّدوك-





الأوله آه



الأوله آه

و التانيه آه

و التالته آه

الأوله مصر . و ف مصر قالوا تونسي و نفوني

جزات الخير

و إحساني

و التانيه تونس . و فيها الأهل جحدوني

و حق الغير

ما وافاني

و التالته باريس . و ف باريس جهلوني

و أنا موليير

في زماني

الأولى أشتكيها للي أجرى النيل

و التانيه لطَّشْتْ فيها ممتثل و ذليل

و التالته دمعي عليها غرَّق الباستيل
رد مع اقتباس

  #10  
قديم 27 / 03 / 2009, 20 : 08 PM
الصورة الرمزية حياة محمود
حياة محمود غير متواجد حالياً
طاقم الاشراف
 
تاريخ التسجيل: 15 / 04 / 2003
الدولة: مصر - الجيزة
المشاركات: 735
افتراضي

الله عليك يا استاذ ايهاب
الاستاذ بيرم الله يرحمه أرض خصبة للشعر العامي والغنائي
تحياتي لحضرتك وتم حفظ القصيدة علي جهازى
__________________
نقرتين لعرض الصورة في صفحة مستقلة
رد مع اقتباس

  #11  
قديم 27 / 03 / 2009, 41 : 08 PM
الصورة الرمزية حياة محمود
حياة محمود غير متواجد حالياً
طاقم الاشراف
 
تاريخ التسجيل: 15 / 04 / 2003
الدولة: مصر - الجيزة
المشاركات: 735
افتراضي

عم بيرم هو عم الجميع
ولقب أمير الزجالين قليل عليه
من عباءة بيرم التونسي خرج صلاح جاهين واحمد فؤاد نجم وفؤاد حداد
الله يرحم الجميع ويبارك في صحة العاشين
وعلي فكرة مش ممكن ابدا كلام عم بيرم وكلمات عم بيرم تتنسي
شكرا يا استاذ ايهاب
__________________
نقرتين لعرض الصورة في صفحة مستقلة
رد مع اقتباس

  #12  
قديم 06 / 04 / 2009, 07 : 07 PM
محمد السيد غير متواجد حالياً
عضو مسجل
 
تاريخ التسجيل: 07 / 05 / 2003
الدولة: مصر
المشاركات: 121
افتراضي


واخد بالك يا استاذ ايهاب
الاستاذ بيرم التنونسي عايزها ايه ؟؟؟
عايزها لحم فصوص مش عود قصب ممصوص
و محربقه بعصعوص و عامله روحها غزال

الله عليه وعليك يا استاذ ايهاب



__________________
الحرية لا توهب لأنها ليست صدقة وإنما تؤخذ لأنها حقِ

محمد السيد
المحامى
رد مع اقتباس

  #13  
قديم 10 / 05 / 2009, 29 : 12 PM
ايهاب وافى
زائر
 
المشاركات: n/a
افتراضي يا مصري ليه دنياك لخابيط

يا مصري ليه دنياك لخابيط و الغلب محيط
و العنكبوت عشش على الحيط و سرح على الغيط
يا مصري قوم هش الوطاويط
كفياك تبليط
صعبة الحياه و الحل بسيط .. حبة تخطيط
يا مصري ليه دنياك لخابيط و الغلب محيط
و العنكبوت عشش على الحيط و سرح على الغي
فتحت باب استيرادك و صرفت فوق ضعف ايرادك
حلي للخواجة استكرادك
سابك بتقرا في اورادك اشطك و نزل تشفي
يا مصري ليه دنياك لخابيط و الغلب محيط
و العنكبوت عشش على الحيط و سرح على الغيط
و مهولاتي تحب تزيط
ساعة الفرح زغاريط تنطيط
و في المياتم هات يا صويت
و في المظاهرة سخن تشيط
و في الانتخاب تنسى التصويت
يا مصري ليه دنياك لخابيط و الغلب محيط
و العنكبوت عشش على الحيط و سرح على الغيط
و ليه بترشي و تتساهل و تضيع حقوقك بالساهل
تستاهل النار تستاهل يا غويط بيحسبك الجاهل
ساهل و ساهي و غبي و ********
يا مصري ليه دنياك لخابيط و الغلب محيط
و العنكبوت عشش على الحيط و سرح على الغيط
يا مصري ياللي الغلا عاصرك
و النهب في عصرك حاصدك
قوم للحياه و اسبق عصرك
و لا حاجة حترجع مصرك
الا ان تكون شغال و نشيط
يا مصري ليه دنياك لخابيط و الغلب محيط
و العنكبوت عشش على الحيط و سرح على الغيط
يا مصري قوم هش الوطاويط
كفياك تبليط
صعبة الحياه و الحل بسيط .. حبة تخطيط
رد مع اقتباس

  #14  
قديم 11 / 05 / 2009, 25 : 05 PM
الصورة الرمزية ابراهيم عمران
ابراهيم عمران غير متواجد حالياً
رئيس مجلس الادارة ووكيل مجلس نقابة المحامين بالجيزة
 
تاريخ التسجيل: 15 / 04 / 2003
الدولة: مصر
المشاركات: 5,664
افتراضي


يا مصري ليه دنياك لخابيط ده شعر الشاعر الكبير سيد حجاب
نقرتين لعرض الصورة في صفحة مستقلة
ويعتبر الشاعر المصري سيد حجاب، من أهم الشعراء العرب المغنى لهم في الأعمال الدرامية من مسلسلات، حيث تتجول قصائده في شواطئ الإسكندرية، المدينة التي درس فيها وأحبها وكتب عنها أحلى القصائد، تلك المدينة التي يلقبها بمدينة النور، لكنه، وبنفس الوقت كتب عن بسطاء مصر أو الغلابة كما يحلو أن يقول عنهم.
سيد حجاب، شاعر الفقراء، حامل همومهم، وحلمهم أيضا، هو الذي يقول دوما "


لو كنت أمير من أمراء الحواتيت،
كنت أدي لكل فقير وفقيرة بيت،
بيت بجنينه مليانه زهور وبعشه مليانه كتاكيت،
وأعلق فوقُ قمر بنور،
ونجوم لولي فتافيت فتافيت


وفي مرة كان بيهزر فطلع هزاره تقيل شوية فقال

سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه
وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا
قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا
وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه
ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا
زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا
ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا
وما نيل المطالب بالطيابه * دى مش دنيا يا شوقى بيه دى غابا



__________________
نقرتين لعرض الصورة في صفحة مستقلة
أنت المشاهد رقم
نقرتين لعرض الصورة في صفحة مستقلة
رد مع اقتباس

  #15  
قديم 11 / 05 / 2009, 59 : 05 PM
الصورة الرمزية ابراهيم عمران
ابراهيم عمران غير متواجد حالياً
رئيس مجلس الادارة ووكيل مجلس نقابة المحامين بالجيزة
 
تاريخ التسجيل: 15 / 04 / 2003
الدولة: مصر
المشاركات: 5,664
افتراضي

شوف يابوب عمنا بيرم مافيش انسان يشبع من كلامه حتي ولو قرا كل ما كتبه مليون مرة
بس بجد بقف كتير قبل موت عمنا بيرم بساعة وهو قاعد علي القهوة وكتب أخر حاجة ليه
كتب عم بيرم
قال اية مراد ابن ادم قولتله شقة قال اية يكفى منامه قولتله طقة قال اية يعجل بعمره قولتله ذقة قال حد فيها مخلد قولتله لأ
بعدها طلع بيته ومات
الله يرحمه عاش غريب ومات غريب
__________________
نقرتين لعرض الصورة في صفحة مستقلة
أنت المشاهد رقم
نقرتين لعرض الصورة في صفحة مستقلة
رد مع اقتباس
إضافة رد


أدوات الموضوع إبحث في الموضوع
إبحث في الموضوع:

البحث المتقدم

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة


الساعة الآن 45 : 03 AM.


Powered by vBulletin® Copyright ©2000 - 2018, Jelsoft Enterprises Ltd. TranZ By Almuhajir

المشاركات المنشورة في شبكة عمران القانونيه لا تعبر عن رأي إدارة المنتدى ولا تمثل إلا رأي كاتبها فقط ..

جميع الحقوق محفوظة لشبكة عمران القانونيةAd Management by RedTyger